काठमाडौं – सरकारले कोरोना संक्रमणका कारण देशभरका सिनेमा हल बन्द गर्ने निर्णय गरेसँगै रिलिज मिति तय गरेका केही सिनेमा मारमा परेका छन् । चैत्र २८ गतेदेखि प्रदर्शनमा आउने भनिएको फिल्म ‘प्रेमगीत ३’ पनि अब निर्धारित समयमा रिलिज नहुने भएको छ ।

सोही मितिमा प्रदर्शन हुने तयारीमा रहेको फिल्म ‘चपली हाइट ३’ पनि अब सो मितिमा रिलिज नहुने भएको छ । यस्तै ‘लक्का जवान’ को प्रदर्शन मिति पनि स्थगित गरिएको छ ।

सय दिन लगाएर शूटिङ सकिएको फिल्म ‘प्रेमगीत ३’ अब चैत्र २८ मा रिलिज नहुने निर्माता तथा निर्देशक सन्तोष सेनले बताए ।

खबरहबसँगको कुराकानीमा सेनले भने, ‘अब त फिल्म रिलिज नै नहुने भयो, यदि रिलिज नै हुने भएको भए पनि सबै काम सक्न हामीलाई गाह्रो पर्ने रहेछ ।’

यतिबेला फिल्मको सम्पादनको काम चलिरहेको निर्माता सेनले बताए । उनका अनुसार ३ दिनअघि मात्र फिल्मको रिसुट गर्नका लागि टिम मुस्ताङ पुगेको थियो । केही दृश्य पुनः छायांकन गरेर फर्किएको टिमले चैत्र २८ मा फिल्म रिलिज गर्ने तयारी गरिरहेको थियो ।

अहिलेसम्म फिल्मको ट्रेलर सार्वजनिक गरिएको छैन । निर्माता सन्तोष सेनका अनुसार फिल्मको ट्रेलर सार्वजनिकको तयारी भइरहेको थियो तर अब भने केही हप्तापछि माहोल हेरेर ट्रेलर सार्वजनिक र नयाँ मिति तय गरिनेछ ।

टिमले केही गीत र ट्रेलर केही समयपछि सार्वजनिक गर्ने बताएको छ । यो फिल्ममा प्रदीप खड्का, क्रिष्टिना गुरुङ, सुनिल थापा, शिव श्रेष्ठ लगायतका कलाकारको अभिनय छ ।

एक प्रतिबन्धित प्रेमकथा भनिएको यो फिल्मलाई सन्तोष सेनले निर्माण गरेका हुन् भने निर्माता सेन र छेतेन गुरुङले निर्देशन गरेका हुन् ।