काठमाडौं – सहिद स्मारक बी डिभिजन लिगको उद्घाटन खेलमा श्रीकुमारी क्लब र व्वाइज युनियन क्लब भिड्ने भएका छन् ।

बी डिभिजन लिगको पहिलो खेलमा आगामि आइताबार दिउँसो साढे १२ बजेदेखि सातदोबाटोस्थित एन्फा कम्प्लेक्स्मा हुनेछ ।

लिगको पहिलो खेलमा श्रीकुमारी र व्वाइज युनियनले खेल्दा सोही दिनको दिउँसो श्रीभगवती क्लब र बाँसबारी क्लबले खेल्नेछन् ।

अघिल्लो बर्ष रेलिगेशन विनाको लिग हुँदा च्याम्पियन आरसीटी यो सिजनमा पनि बी डिभिजनमै खेल्न बाध्य छ ।

तर, यस वर्ष भने एन्फाले पहिलो हुने टोली ‘ए’ डिभिजन लिगमा प्रमोसन हुने र पुछारको एक टोली घटुवा हुने बताएको छ ।

राउण्ड रोविन लिगका आधारमा हुने बी डिभिजनमा ६६ वटा खेल हुनेछन् । लिगमा पहिलो हुने टोलीले १५ लाख पुरस्कार पाउनेछ भने दोस्रो हुनेले १० लाख, तेस्रो हुनेले ८ लाख र चौथो हुनेले ५ लाख पाउनेछन् ।

अघिल्लो सिजनमा लिगको पुछामा रहेका नयाँ बस्ती क्लब र बाँसबारी क्लबको १–१ अंक घट्नेछ ।

गत शनिबार सम्पन्न ए डिभिजन लिगबाट घटुवा भएको सरस्वती युवा क्लबले अर्को वर्षको बी डिभिजन लिग खेल्नेछ ।