मानिसको व्यक्तित्वमा प्रत्यक्ष असर गर्ने कपाल शरीरलाई स्वस्थ राख्न पनि महत्वपूर्ण छ ।

कपालले मानिसको सौन्दर्य बढाउँछ । तर कतिपय अवस्थामा हेरचाह र स्याहार नपुग्दा कपाल झर्ने र तालु खुइलिने समस्या हुन्छ ।

अधिकांशमा वंशाणुगत कारणले कपाल झरे पनि केहीमा भने कपालमा लगाउने क्रिम, तेल, जेल, रंग र स्ट्रेट गरेका कारणले पनि कपाल झर्दछ । यसरी कपाल झरेको कारण धेरै मानिसहरु चिन्तित रहने गर्दछन् ।

पछिल्लो समय कपाल प्रत्यारोपणप्रति मानिसको मोह बढ्दो छ ।

के हो कपाल प्रत्यारोपण ?

कुनै पनि व्यक्तिको कपाल नभएको स्थानमा कपाल रोप्नुलाई प्रत्यारोपण गर्नु बुझिन्छ । अर्थात टाउकाको अगाडि र बीचको भागमा कपाल नहुँदा टाउको पछाडिको अर्थात् गर्धनको कपाल उखेलेर रोप्नुलाई कपाल प्रत्यारोपण भनिन्छ ।

यस्तोमा गर्धनको कपाल जरा सहित निकालेर कपाल एउटा–एउटा गरेर तालुमा रोपिन्छ । प्रत्यारोपणपछि कोष सक्रिय भएर रोपिएको ठाउँमा कपाल उम्रन थाल्दछ । यसरी रोपिने कपाल उखेलेको ६ घण्टाभित्रै प्रत्यारोपण गरीसक्नु पर्छ अन्यथा कपालको कोष मर्दछ ।

कपाल रोपेको एक सातामा २० प्रतिशतसम्म कपाल आफैं झर्दछ । तर यो कपाल पुनः पलाउँछ । प्रत्यारोपण गरेको तीन महिनामा रोपिएको कपालको मौलिक जरा बनिसक्छ । प्रत्यारोपण गरिएको कपाल जीवनभर रहन्छ ।

यो सामान्य कपालजस्तै बढ्छ र यसलाई सामान्य कपाल झै धुन, तेल लगाउन, कोर्न र काट्न समेत मिल्दछ ।