काठमाडौं- स्पेनिस ला लिगा फुटबल अन्तर्गत शनिबार राति भएको खेलमा जित हात पार्दै रियल मड्रिडले शीर्ष स्थानमा उक्लिएको छ ।

रियलले सेभियालाई २-१ गोल अन्तरले पराजित गर्दै शीर्ष स्थानमा उक्लिएको हो । घरेलु मैदानमा भएको खेलमा रियलको जितमा कासिमिरोले दुवै गोल गरेका थिए । सेभियाका लुक डी जोङले एक गोल फर्काए ।

सान्टियागो बेर्नाबेउमा पहिलो हाफ गोलरहित बराबरी खेलेको रियलले ५७ औं मिनेटमा कासिमिरोको गोलबाट अग्रता बनाएको थियो ।

६४ औं मिनेटमा जोङले गोल गर्दै सेभियालाई १-१ को बराबरीमा ल्याए । तर, खेलको ६९ औं मिनेटमा कासिमिरोले व्यक्तिगत दोस्रो गोल गर्दै रियललाई २-१ को जित दिलाए ।

जितसँगै शीर्ष स्थानको रियलले २० खेलबाट ४३ अंक जोडेको छ । रियलले दोस्रो स्थानको बार्सिलोनालाई ३ अंकले पछि पारेको छ । बार्सिलोनाको १९ खेलमा ४० अंक रहेको छ ।

सेभिया २० खेलमा ३५ अंक जोडेर चौंथो स्थानमा रहेको छ ।