काठमाडौँ– संस्कृति पर्यटन तथा नागरिक उड्ययनमन्त्री योगेश भट्टराईले कोरोनाबाट धरासयी बनेको पर्यटन क्षेत्रलाई उकास्न हप्तामा दुई दिन बिदा हुने गरी प्रस्ताव अघि सारिएको बताएका छन् ।

शुक्रबार मन्त्रालयमा निजामती कर्मचारीहरुको आधिकारिक ट्रेड युनियन केन्द्रीय कार्यसमितिले आयोजना गरेको ‘पर्यटनमा कोभिड–१९ को प्रभाव र भावीकार्यदिशा’ विषयक कार्यक्रममा उनले सन् २०२१ लाई आन्तरिक पर्यटन भ्रमण वर्षका रुपमा जोड दिँदै दुई दिने विदाको अवधारणालाई छलफलका लागि अघि सारेको बताएका हुन ।

मन्त्री भट्टराईले घोषणा गरे पनि नगरे पनि सन् २०२१ हाम्रा लागि आन्तरिक पर्यटन वर्ष भएको बताए ।

नेपालको अर्थतन्त्रमा ७० प्रतिशत अर्थात् झण्डै ८० अर्ब विदेशी मुद्रा आर्जनमा योगदान गर्दै आएको पर्यटन क्षेत्रमा कोभिड–१९ को महामारीको सबैभन्दा ठूलो मार परेको उनको भनाइ छ । उनले यस विषयमा सबै पक्षसँग छलफल गरेर मात्र निष्कर्षमा पुग्न सकिने बताए ।

कोभिड १९ को महामारीका सन्दर्भमा सरकारले केही गरेन भनेर आलोचना गर्नेहरुका लागि उनले कुनै पनि देशको साधन, स्रोत कति थियो र त्यसको परिचालन कति भयो भन्ने कोणबाट परिणाम खोज्नु पर्ने धारणा राखेका थिए ।