काठमाडौँ – स्पेनिस महारथि क्लब बार्सिलोनाका अध्यक्ष जोसेफ मारिया बार्तामेउविरुद्ध अविस्वासको मत राखिएको छ।

बार्सिलोनामा उनीविरुद्ध आवश्यक पर्ने मत अविश्वासको प्रस्तावका रुपमा दर्ता भएसँगै उनको पद धरापमा रहेको छ ।

अविश्वासको मतलाई समर्थन गर्नेमा आगामी निर्वाचनमा अध्यक्षको उम्मेदवारको रुपमा अघि रहेका तीन जना जोर्डी फारे भिक्टोर फन्ट र ल्युस फर्नान्डेज अलसहित आठ विचार समूहहरु समावेश छन् ।

यदि दुई तिहाई संख्या यसको पक्षमा रहे भने क्लबले बार्तामेउलाई पदबाट हटाउन बाध्य पार्नेछ र क्लबको नयाँ अध्यक्ष छान्न चुनाव हुनेछ ।

हस्ताक्षर प्रमाणिकरण भएपछि १ लाख ५० हजार सदस्यहरुले यस विषयमा मतदान गर्नेछन । जसमा कम्तीमा ६६ प्रतिशत मतले अविश्वासको प्रस्तावमा मतदान गरे बार्तामेउको अध्यक्ष पद सकिनेछ ।

हस्ताक्षरको प्रमाणिकरण गरेपछि बार्सिलोनाले बार्तामेउ रहने कि नहरने भन्ने निर्णय गर्ने बीबीसीले उल्लेख गरेको छ ।

बार्सिलोनाका कप्तान लियोनल मेस्सीले अगस्टमा क्लब छाड्न गरेको प्रस्ताव पछि क्लब समर्थकहरु बार्तामेउसँग आक्रोसित बनेका हुन् ।

त्यसोत मेस्सी क्लबमा रहे आफु क्लब छाड्न तयार रहेको बार्तामेउले अगस्टमै घोषणा पनि गरेका थिए ।

बार्सिलोनाका अध्यक्षविरुद्ध अविश्वासको मत खप्ने बार्तामेउ तेस्रो अध्यक्ष हुन् । यसअघि सन् १९९८ मा तत्कालिन अध्यक्ष लुइज नुनेज र २००८ मा जोन लार्पोतामाथि पनि अविश्वासको मत दर्ता भएको थियो ।