काठमाडौं । प्रमुख प्रतिपक्षी दल नेपाली कांग्रेसले बाढीपहिरो पीडितको राहतका लागि विभिन्न ३० वटा जिल्लामा ४५ लाख रुपैयाँ पठाएको छ ।

कांग्रेस केन्द्रीय कार्यालयले बाढी पहिरोका कारण भएको क्षतिमा उद्वार र राहतको जिल्ला स्तरीय अभियानलाई सहयोग पुयाउन भन्दै प्रतिजिल्ला डेढ लाख रुपैयाँका दरले ४५ लाख रुपैया पठाएको हो ।

जिल्ला कार्यसमितिका नाममा पठाइएको रकम बाढी पहिरोका कारण क्षति भएकाहरुलाई राहत वितरणमा खर्च हुने कांग्रेस मुख्यसचिव कृष्णप्रसाद पौडेलले जारी गरेको विज्ञप्तिमा जनाइएको छ ।

‘स्नेहको सानो सहयोग’का रुपमा कांग्रेसले लमजुङ, सिरहा, गुल्मी, नुवाकोट, स्याङ्जा, बाग्लुङ, म्याग्दी, पाल्पा, ताप्लेजुङ, ओखलढुंगा, संखुवासभा, पर्वत, सिन्धुपाल्चोक, महोत्तरी, पर्सा, धादिङ, पाँचथर, तेह्रथुम, मकवानपुर, बारा, सर्लाही, काभ्रे, रसुवा, धनुषा, सिन्धुली, बझाङ, जाजरकोट, खोटाङ, बाजुरा र कास्कीमा सहयोग पठाएको हो ।