काठमाडौं- बागमती प्रदेशमा कोरोना भाइरस संक्रमितकाे संख्या ८५३ पुगेकाे छ। शनिबार दुई जनामा संक्रमण भएसँगै संक्रमितको संख्या ८५३ पुगेको हो।

पछिल्लो २४ घण्टामा नुवाकोटमा एक जना र मकवानपुरमा एक जनामा कोरोना भाइरस संक्रमण पुष्टि भएको सामाजिक विकास मन्त्रालयले जनाएको छ।

संक्रमितमध्ये चार सय ३२ जना डिस्चार्ज भएका छन्। मन्त्रालयका अनुसार बागमती प्रदेशको रसुवा जिल्ला कोरोनामुक्त भएको छ।

प्रदेशमा ४ सय १२ जना संक्रमित विभिन्न अस्पतालमा उपचार गराइरहेका छन्। यस्तै कोरोना भाइरस संक्रमणबाट ९ जनाको मृत्यु भएको मन्त्रालयले जनाएको छ।

मन्त्रालयका अनुसार काठमाडौंमा २ सय ४६, ललितपुरमा ७५, भक्तपुरमा ४९ जना संक्रमित भएका छन्।

दोलखामा सबैभन्दा कम अर्थात् १० जनामा संक्रमण देखिएको छ। यस्तै नुवाकोटमा ३५, धादिङमा एक सय ३०, चितवनमा एक सय १३ जनामा कोरोना संक्रमण पुष्टि भएको छ।

सिन्धुलीमा २४, मकवानपुरमा ३८, रामेछापमा ३३, काभ्रेमा २० र सिन्धुपाल्चोकमा ६९ जनामा कोरोना संक्रमण पुष्टि भएको मन्त्रालयले शनिबार जारी गरेको तथ्यांकमा उल्लेख छ ।

नेपालमा शनिबारसम्म कोरोना संक्रमितको कुल संख्या १७ हजार ५०२ पुगेको छ। हालसम्म कोरोनाका कारण नेपालमा ज्यान गुमाउनेको संख्या ४० पुगेको छ ।