चीनको वुहान शहरमा कोरोना भाइरसको महामारीले विश्वभर संत्रास फैलाइरहेको छ । महामारीबाट हालसम्म करिब १ हजार ९ सय जनाको ज्यान गइसकेको छ भने अरु दशौं हजार संक्रमित छन् । यो महामारीको भविष्यवाणी ३९ वर्ष अघि लेखिएको एउटा किताबमा गरिएको थियो भन्दा सायदै कसैलाई विश्वास लाग्ला ।

तर, सन् १९८१ मा अमेरिकी डिन कुन्जले लेखेको ‘द आइज अफ द डार्कनेस’ नामक उपन्यासमा यस्तै किसिमको भाइरसको परिकल्पना गरिएको थियो । यो पुस्तक न्यूयोर्क टाइम्सको ‘बेस्ट सेलर’को सूचीमा समेत अटाएको थियो ।

उक्त पुस्तकको ३९ औं अध्यायमा लेखक कुन्जले मुलुकको वुहान शहरनजिकै चीनको कम्युनिस्ट पार्टीले प्रयोगशालामार्फत् वुहान ४०० नामक भाइरसको विकास गर्ने उल्लेख गरेका थिए । जैविक हतियारका लागि विकास गरिएको उक्त भाइरसले अरु कुनै जनावरलाई नभई मानिसलाई मात्र संक्रमण हुने र यसबाट संक्रमित हुने हरेक मानिस मृत्युको मुखमा पुग्ने भनी यस पुस्तकमा लेखिएको छ । कुन्जको पुस्तकमा लेखिएअनुसार यो भाइरस मानिसको शरिरबाहिर र ३० डिग्री सेल्सियस भन्दा कम तापक्रममा बाँच्नै नसक्ने उल्लेख छ ।

यस पुस्तकमा वुहान ४०० को शोध गर्ने ली चेन नामक वैज्ञानिकले अमेरिकालाई यसबारे जानकारी दिने लेखिएको छ ।

उपन्यासमा लेखिएको भाइरस र अहिले वुहान शहरमा देखिएको भाइरस एकदमै मिल्नेजुल्ने रहेको भन्दै सामाजिक सञ्जाल प्रयोगकर्ताहरु अचम्ममा परेका छन् ।

यद्यपि उपन्यासमा भनिएको भाइरस र अहिले देखिएको कोरोना भाइरसमा एउटा ठूलो असमानता पनि रहेको छ । जहाँ उपन्यासको भाइरसबाट संक्रमित सबैको मृत्यु हुनेछ भन्ने उल्लेख छ भने कोरोना भाइरसको संक्रमण भएका अधिकांश मानिसहरु पुनः स्वस्थ हुने सम्भावना बढी छ ।

आलोचकहरुले भने कुन्जले सन् १९८१ मा यस पुस्तक लेख्दा तत्कालीन सोभियत संघको गोर्की शहरनजिक सोभियत संघको सत्तारुढ कम्युनिस्ट पार्टीले गोर्की ४०० नामक भाइरसको विकास गर्ने उल्लेख थियो ।

सोभियत संघको विघटनपछि भने पुस्तकका पछिल्ला संस्करणमा यो भाइरसको नाम गोर्कीबाट परिवर्तन गरी वुहान ४०० राखिएको छ ।