काठमाडौँ- बिहीबार मात्रै नेपाली राष्ट्रिय क्रिकेट टोलीका मुख्य प्रशिक्षक नियुक्त भएका देव वाटमोर १ वर्षका लागि नेपाल आउने भएका छन् ।

नेपाल क्रिकेट संघ (क्यान) स्रोतका अनुसार उनी अहिले पहिलो १ वर्षका लागि नेपाल आउन तयार भएका हुन्। उनीसँग अहिले १ वर्षको सम्झौता भएको छ । ‘हामीले २ वर्षका लागि अनुरोध गर्नेछौँ,´ स्रोतले भन्यो, ‘अहिले एक वर्षका लागि मात्र आउने भन्नुभएको छ ।’

विश्वका चर्चित प्रशिक्षक वाटमोर के कति रकममा नेपाल आउने भए भन्ने प्रश्नमा क्यान स्रोतले भन्यो, ‘करसहित १० हजार अमेरिकी डलर बराबर पारिश्रमिक पाउनेछन्।´

को हुन् वामोर ?

देब वाटमोर विश्व क्रिकेटमा चर्चित नाम हो । यो नाम नेपाली क्रिकेट समर्थकका लागि समेत नयाँ होइन । सन् २०१७ मा उनले नेपाली क्रिकेट टीमलाई २ हप्ता अभ्यास गराएका थिए ।

श्रीलंकाको कोलम्बोमा जन्मिएका उनले अस्ट्रेलियाबाट क्रिकेट खेलेका हुन् । उनको परिवार अस्ट्रेलिया बसाई सरेपछि उनले उतैबाट क्रिकेट खेले ।

फस्ट क्लास क्रिकेट सन् १९७५ मा खेलेका उनी सन् १९७९ देखि ०८० सम्म मात्रै अस्ट्रेलियन टोलीमा रहे । अष्ट्रेलियाका लागि ७ टेष्ट र एक एकदिवसीय अन्तराष्ट्रिय खेल खेले । सन् १९८८, १९८९ मा अन्तर्राष्ट्रिय क्रिकेटबाट सन्यास घोषणा गरेका उनले त्यसपछ भने आफुलाई प्रशिक्षकमा रुपान्तरण गरे।

दायाँ हाते ब्याट्सम्यान बाटमोरले प्रशिक्षकका रुपमा भने विश्वभर ख्याति कमाए । उनलाई सफल बनाउने टीम हो श्रीलंका क्रिकेट । जसलाई उनले सन् १९९६ को आईसीसी विश्वकप उपाधि दिलाएका थिए । सामान्य जस्तै रहेको श्रीलंकन क्रिकेट टीमलाई उनले विश्वमाझ चिनाइ छाडे । अझ विश्व विजेता नै बनाए ।

श्रीलंकाबाट राजीनामा दिएपछि बाटमोर बंगालादेश क्रिकेट टीमको प्रशिक्षकका रुपमा सन् २००३ देखि ००७ सम्म बंगलादेशमा काम गरे । जसमा उनको पालामा बंगलादेशले भारतलाई आईसीसी विश्वकपमा पराजित गर्न सफल भएको थियो ।

बंगलादेशबाट राजीनामा दिइसकेपछि कुनै समय भारत, इङ्ग्ल्यान्ड र पाकिस्तान क्रिकेट टीमले उनलाई प्रशिक्षक बनाउने तयारी गरेका थिए ।

विभिन्न कारणले गर्दा उनी यी तीनवटै टोलीको मुख्य प्रशिक्षक भएनन् । तर, पछि भारतीय यु–१९ क्रिकेट टीमको भने उनी प्रशिक्षक बने । उनकै नेतृत्वमा भारती टोलीले सन् २००८ को यु–१९ विश्वकपको उपाधि हात पारेको थियो । जसको कप्तानी विराट कोहलीले गरेका थिए ।

पाकिस्तान क्रिकेट टीम र जिम्बाबेको मुख्य प्रशिक्षक भइसकेका उनले इन्डियन प्रिमियर लिग (आईपीएल) मा कोलकाता नाइट राइडर्सको पनि प्रशिक्षकको जिम्मेवारी सम्हालिसकेका छन् ।