पैताला वा हत्केलामा हुने खिललाई अंग्रेजीमा कोर्न भनिन्छ । यो प्राय पैतालामा काँडा बिझ्यो र निस्केन अथवा केहि टुक्रा भित्र रह्यो भने पछि गएर खिलमा बदलिन्छ ।

खिल प्रायः दबाब पर्ने स्थानमा हुने गर्दछ । शरीरको कुनै एक भागमा बारम्बार घर्षण र दबाब पर्दछ र त्यहाँको छाला मृत हुन्छ भने त्यहा खिल हुन सक्छ । यो प्रायः खुट्टाको औँला, पैताला, हत्केला र हातका औँलामा देखिने गर्दछ ।

पहिचान गर्ने तरिका
खुट्टाको पैताला र हातको छालामा मोटो गाठो र खस्रोपन देखिन्छ, जसको बीच भागमा डटपेनको टुप्पोले थिच्दा दुखाई महशुस हुन्छ भने त्यो खिल हो भन्ने बुझ्नु पर्दछ ।

खिल हेर्दा सानो देखिन्छ । यसको बीचमा कालो टिका जस्तो चिन्ह हुन्छ । जहाँ मृत छाला उठेको हुन्छ । कुनै कुनै खिल नरम सेतो रबरजस्तो हुन्छ र छुदाँ कोमल हुन्छ ।

उपचार
खिलको उपचार प्रायः यहि नै भन्ने हुदैन । प्रायःले माथिल्लो भागमा देखिने बाक्लो छालाको मृत तह काट्ने गर्दछन् । कसैले कर्नटेप लगाएर हटाउने गर्दछन् । यसलाई शल्यक्रिया गरेर पनि निकाल्न सकिन्छ ।

चिकित्सकको परामर्श बिना यसो गर्दा यसको दुष्प्रभाव देखिन सक्छ । साथै केही समय पश्चात फेरि खिल देखा पर्न सक्छ । त्यसैले खिलका बिषयमा एक पटक चिकित्सकको परामर्श लिनु नै उत्तम हुन्छ ।