बुटवल – रुपन्देहीको देवदह नगरपालिकास्थित एक क्वारेन्टिनमा रहेका एक युवक झुण्डिएको अवस्थामा फेला परेका छन् ।

देवदह नगरपालिका—४, सेमरानास्थित आदिवासी जनजाति महासंघको भवनमा रहेको क्वारेन्टिमा सोही वडाका २५ वर्षीय पीताम्बर पाण्डे बुधबार राति झुण्डिएर मरेको अवस्थामा फेला परेका हुन् ।

इलाका प्रहरी कार्यालय बुटबलका अनुसार भदौ १७ गते भारतबाट आएका पीताम्बर क्वारेन्टिनमा बसेको १३ दिन पुगेको थियो । राति भवनको बाहिरपट्टि छतमा रहेको फलामको रडमा उनी झुण्डिएको फेला परेका हुन् । उनले आत्महत्या गरेको अनुमान गरिएको छ ।

पाँच दिनअघि पिसिआर परीक्षणका लागि उनको स्वाब लिइएको थियो तर रिपोर्ट आएको थिएन । ‘आज वा भोलि रिपोर्ट आइपुग्ने कुरा थियो,’ देवदह नगरपालिकाका स्वास्थ्य शाखा प्रमुख काशिनाथ बन्जाडेले भने, ‘उनले आत्महत्या गर्नुको कारण खुलेको छैन ।’

घटनाको अनुसन्धान सुरु गरेको इलाका प्रहरी कार्यालय बुटवलका प्रमुख डीएसपी प्रतितसिंह राठौरले बताए । यसअघि पनि सोही क्वारेन्टिनमा एकजनाले आत्मदाह गरेका थिए । उपचारका क्रममा उनको मृत्यु भएको थियो ।