दार्चुला- प्रधानसेनापति पूर्णचन्द्र थापा र सशस्त्र प्रहरी महानिरीक्षक शैलेन्द्र खनालले बुधबार दार्चुलाको उत्तरी सीमा ब्यास क्षेत्रको निरीक्षण गरेका छन् ।

नेपाली सेनाको हेलिकप्टरमार्फत् बुधबार बिहान दार्चुला पुगेका प्रधानसेनापति र सशस्त्रका आईजीपीले नेपाली सेनाले निर्माण गरिरहेको ब्यास गाउँपालिका २ घाटीबगडको गोरेटो बाटोको स्थलगत अनुगमन तथा निरिक्षण गरेका हुन् ।

सेनाले नेपालको बाटो भएर ब्यास क्षेत्र जानका लागि घाटीबगड क्षेत्रमा गोरेटो बाटो निर्माण गरिरहेको छ ।

प्रधानसेनापति थापाले निर्माण कार्यस्थल पुगेर निर्माणमा सावधानी अपनाएर काम गर्न सेनाको विकास निर्माण कार्यदललाई निर्देशन दिए ।

उनीहरुले ब्यास गाउँपालिका १ छाङ्रुमा स्थापना गरिएको सशस्त्र प्रहरीको बिओपीको पनि निरीक्षण गरेका थिए  ।

सशस्त्र महानिरीक्षक खनालले दार्चुला सदरमुकाम खलंगामा निर्माण भएको सशस्त्र प्रहरीको नम्बर ५० गुल्मको भवनको आजै उद्घाटन गरेका थिए ।