काठमाडौं- स्वास्थ्य मन्त्रालयका अनुसार कोभिड १९ का कारण ३९ वर्षीया महिलाको मृत्यु भएपछि उनको सम्पर्कमा आएका व्यक्तिहरुको खोजी कार्य जारी रहेको छ ।

स्वास्थ्य मन्त्रालयका प्रवक्ता डाक्टर विकास देवकोटाका अनुसार इपिडिमियोलोजी तथा रोग नियन्त्रण महाशाखाको संयोजकत्वमा त्रिवि शिक्षण अस्पतालको कम्युनिटि मेडिसिन युनिट, धुलिखेल अस्पतालको कम्युनिटि मेडिसिन युनिटले कन्ट्याक्ट ट्रेसिङको काम गरिरहेको छ ।

डा देवकोटाका अनुसार मृतक संक्रमित महिलाको सम्पर्कमा आएका व्यक्तिको नमूना संकलनको काम समेत शुरु भएको छ । डा देवकोटाका अनुसार गोंगबु, माछापोखरी लगायतका क्षेत्रमा ४ सय भन्दा बढीको नमुना संकलन गरिएको छ ।

डा देवकोटाका अनुसार नेपालमा हालसम्म कोरोना संक्रमितको संख्या २ सय ९१ पुगेको छ भने ३६ निको भएर डिस्चार्ज भएका छन् । यस्तै हालसम्म दुई जनाको मृत्यु भइसकेको छ ।

प्रवक्ता डाक्टर देवकोटाका अनुसार पछिल्लो २४ घण्टामा १ हजार ७ सय ६९ वटा नमूना पीसीआर विधिबाट कोरोना परीक्षण भएको छ ।

पीसीआर विधिबाट २८ हजार १ सय ६० पुगेको छ भने आरडीटीबाट ६७ हजार ७ सय ७० नमूना परीक्षण भएको छ । गत २४ घण्टामा
२ हजार २० आरडीटी विधिबाट परीक्षण भएको छ ।

यस्तै देशभर १८ हजार ३ सय ५७ जना व्यक्ति क्वारेन्टाइमा रहेका छन् । यस्तै देशभरका विभिन्न अस्पतालमा ३ सय ४६ जना आइसोलेनमा रहेका छन् ।