एजेन्सी- इजरायलस्थित चिनियाँ राजदूत दु वेइ राजधानी तेल अभिभको हेर्जलिया उपनगरमा रहेको आफ्नै आवासगृहमा मृत अवस्थामा भेटिएका छन् ।

५८ वर्षीय उनी आफ्नै ओछ्यानमा मृत भेटिएको तर मृत्युको कारण नखुलेको इजरायलका सञ्चार माध्यमहरूले जनाएका छन्।

युक्रेनमा चिनियाँ दूतको रूपमा काम गरेका उनी गत फेब्रुअरी महिनामा राजदूत नियुक्त भएका थिए। उनी विवाहित थिए र उनका एकजना छोरा पनि छन्। तर उनको परिवार इजरायलमा नरहेको बताइएको छ । चीनले उनको मृत्युको पुष्टि गरेको छैन।

इजरायल प्रहरीका एकजना प्रवक्ताले समाचार संस्था रोयटर्सलाई भने, “नियमित प्रक्रियाअनुसार प्रहरी टोली घटनास्थलमा छन्।”

इलरेलको च्यानल १२ टीभीले नाम नखुलाइएको सूत्रलाई उद्धृत गर्दै उनको मृत्यु प्राकृतिक कारणहरूले गर्दा भएको प्रारम्भिक सङ्केतले देखाएको उल्लेख गरेको छ।

उनको नियुक्ति लगत्तै राजदूतावासको वेबसाइटमा सार्वजनिक गरिएको सन्देशमा राजदूत दुले ‘विश्वकै दोस्रो ठूलो अर्थतन्त्र र इजरायलबीचको सम्बन्धको’ प्रशंसा गरेका थिए।