बारा – जिल्ला प्रहरी कार्यालय बाराका एक प्रहरी जवानमा कोरोना भाइरसको संक्रमण देखिएसँगै उनको सम्पर्कमा रहेका २५ जना प्रहरीलाई क्वारेन्टाइनमा राखिएको छ ।

कलैयास्थित जिल्ला प्रहरी कार्यालयको मुद्दा फाँटमा कार्यरत प्रहरी जवानलाई संक्रमण देखिएको प्रहरी निरीक्षकसहित २५ प्रहरीलाई जिल्ला प्रहरी कार्यालय नजिकै स्थानीय बाल मन्दिरको क्वारेन्टाइनमा राखिएको हो ।

जिल्ला प्रहरी कार्यालयका २५ प्रहरी, जिल्ला प्रशासन कार्यालयको मुद्दा शाखाका तीन र सरकारी वकिल कार्यालयका तीन कर्मचारी गरी ३१ जनाको स्वाब संकलन गरिसकिएको बाराका डीएसपी गौतम मिश्रले जानकारी दिए।

संक्रमित प्रहरी जवानलाई भने जिल्ला प्रहरी कार्यालयमै आइसोलेसनमा राखिएको छ। रौतहट घर भएका उनी यही वैशाख २९ मा घर गएर भोलिपल्ट काममा फर्किएको खुलेको छ ।