काठमाडौं – सरकारले नेपालमा लकडाउन गरेको झण्डै एक महिना पुग्न लागेको छ । सरकारले वैशाख १५ गतेसम्म लकडाउन गर्ने निर्णय गरेको छ । यद्यपि धेरैलाई यो लकडाउन पुनः लम्बिने डरले सताएको छ । दैनिक ज्याला मजदुरी गरेर गुजारा चलाउनेहरु हप्तौं हिडेर घर पुगेका छन् ।

सामाजिक सञ्जालमा मजदुरलाई घर जाने वातावरण नबनाएको भन्दै सरकारको व्यापक आलोचना भएको छ । यसैबीच हास्यकलाकार कुमार कट्टेल (जिग्री) ले प्रधानमन्त्री ओलीलाई ती मजदुरलाई घरसम्म पु¥याउन व्यवस्थाका लागि आग्रह गरेका छन् ।

‘प्रधानमन्त्री ज्यू, तपाईं त सरकारको नेतृत्त्व गरिरहेको कम्युनिस्ट पार्टीको अध्यक्ष, कम्युनिस्ट पार्टी त मजदुर र सर्वहारा वर्गको पार्टी हो सुनेको थिएँ,’ कुमार कट्टेल लेख्छन्, ‘आज विपत्तिमा गरीब, मजदुरहरु भोकभोकै हिँडेर घर गइरहँदा तपाईको पार्टी र सरकार गरीब र मजदुरकै हो र भन्ने प्रश्नमा मनमा आयो ।’

उनले यो देशको नागरिकको हैसियतले जिल्ला–जिल्ला र स्थानीय तहको समन्वयका लागि पास मिलाइदिन पनि अनुरोध गरेका छन् ।

साथै कट्टेलले आफ्नो व्यक्तिगत खर्चमा गाडीको व्यवस्था गरी फसेका गरीब र मजदुरको पहिचान गरी घर पु¥याइदिने पनि बताएका छन् ।