काठमाडौं- नेपाल कम्युनिष्ट पार्टीका नेता एवम् सांसद प्रभु साहले इँटा उद्योग सञ्चालकको ज्यान मार्ने गरी भएको घटनाको भर्त्सना गरेका छन् ।

नेकपा प्रदेश नम्बर २ का अध्यक्षसमेत रहेका साहले रौतहटको गरुडा नगरपालिका वडा नम्बर ६, अमरपट्टीस्थित ‘दाइभाइ इँटा उद्योग’ का सञ्चालक एवं नेकपाको रौतहट जिल्ला सदस्य रामबाबु चौधरीका भाइ मुकेश कुमार चौधरीमाथि सांघातिक हमलामा संलग्नलाई कारबाहीको माग गरेका छन् ।

मंगलबार विज्ञप्ति जारी गर्दै नेता साहले भनेका छन्, ‘रौतहट जिल्लाको गरुडा नगरपालिका वडा नम्बर ६, अमरपट्टीमा रहेको दाइभाइ इँटा उद्योगमा दर्जनौंको संख्यामा अपराधिक समूहले योजनावद्ध रुपमा रामबाबु चौधरीज्यूका भाइ मुकेश कुमार चौधरीमाथि सांघातिक आक्रमण गरी गम्भीर घाइते बनाएका छन्।’

पार्टीका नेतालाई ज्यान मार्ने उद्देश्यले गरिएको यस आपराधिक कार्यको विज्ञप्तिमार्फत घोर भर्त्सना गरिएको छ ।

घटनाको निष्पक्ष छानविन गरी घटनामा संलग्नमाथि कडाभन्दा कडा कानूनी कारबाहीको माग गरिएको छ ।

गत आइतबार गरुडा नगरपालिका वडा नम्बर ६ का वडाध्यक्ष अशोक यादवको अगुवाइमा दर्जनौंको संख्यामा गएको समुहहरुले उक्त उद्योगमा आक्रमण गरी मुकेशलाई गम्भीर घाइते बनाएको विज्ञप्तिमा जनाइएको छ ।

आक्रमणकारीहरुले इटा भट्टामा रहेको एक थान जेसीबी, एक थान टिप्पर, दुई थान ट्र्याक्टर र ३ वटा मोटरसाइकलमा तोडफोड गरेको जनाइएको छ ।