काठमाडौं– राष्ट्रिय खेलकुद परिषद् (राखेप) ले १ हप्ताका लागि सम्पूर्ण खेलकुद गतिविधि बन्द गर्न निर्देशन दिएको छ ।

मंगलबार राखेपका सदस्य सचिव रमेश कुमार सिलवालको नेतृत्वमा बसेको बैठकले नोबेल कोरोना भाईरस ( कोभिड – १९ ) ले विश्वभर महामारीको रुप लिइरहँदा नेपालमा सम्भावित संक्रमण रोक्नका लागि १ हप्ता खेल गतिविधि बन्द गर्न निर्देशन दिने निर्णय गरेको हो ।

राखेपले कोरोना भाइरसको जोखिमबाट बच्न सचेतना अपनाउनु अत्यावश्यक भएको भन्दै कुनै पनि खेलकुद प्रतियोगिता, प्रशिक्षण, सभा, सम्मेलन, गोष्ठी, सेमिनारलगायत मानवीय भेला हुने सम्पूर्ण गतिविधि तत्काललाई बन्द गर्ने निर्णय गरेको छ ।

यसका साथै खेलाडी, प्रशिक्षक, खेल पदाधिकारी, कर्मचारीहरु, खेलसंग सम्बन्धित व्यक्तिहरु र आम जनमानसलाई पनि सचेतना अपनाउन परिषदले आव्हान गरेको छ ।