काठमाडौं- करीब ३८ क्वीन्टल सुन तस्करीको चर्चित प्रकरणका फरार ४ जना अभियुक्त सुटुक्क हाजिर भएपछि जिल्ला अदालत मोरङले धरौटिमा छाडेको छ ।

जिल्ला अदालत मोरङका न्यायाधीश मेदनीप्रसाद पौडेलको इजलासले धरौटीमा छाड्ने आदेश दिएपछि चुणामणि उप्रेती गोरेकी श्रीमती, नर्वदा, चेतनाथ भण्डारी, गीता श्रेष्ठ र सुनील श्रेष्ठ रिहा भएका हुन् ।

मोरङ उर्लाबारीका सनम शाक्य हत्या अनुसन्धानका क्रममा खुलेको करीब ३८ क्वीन्टल सुन तस्करी प्रकरणमा २०७५ बैशाख १९ गते ६३ जनालाई प्रतिवादी बनाएको थियो ।

उनिहरुमाथी अपराधिक समूह स्थापना गरी सुन चोरी पैठारी र चोरी निकासीको अवैध कारोबार, अपहरण तथा शरीर बन्धक र कर्तब्य ज्यान मुद्दा दर्ता भएको थियो ।

फरक-फरक मितिमा हाजिर भएका उनीहरुलाई जिल्ला अदालत मोरङका न्यायाधीश मेदनीप्रसाद पौडेलको इजलासले गत पुस ४, १६ र २१ गते उनिहरुलाई धरौटीमा छाड्ने आदेश दिएको थियो ।

२०७४ फागुन १८ गते उर्लाबारीका सनम शाक्यको हत्या भएपछि सुन तस्करीको प्रकरण बाहिरिएको थियो ।