काठमाडौँ–  बलात्कार प्रयास (जवरजस्ती करणी उद्योग)को मुद्दामा निवर्तमान सभामुख कृष्णबहादुर महराले सफाइ पाउनुमा मुख्यतया दुई वटा कारण रहेको जिल्ला अदालत काठमाडौंको फैसलामा उल्लेख छ ।

पहिलो कारण पीडित भनिएकी महिलाले महरा आफ्नो कोठामा नआएको बयान दिएको र महराले पनि महिलाको कोठामा गएको कुरा अस्वीकार गरेकाले महरालाई दोषी करार गर्नुपर्ने आधार नदेखिएको र अर्को पीडित भनिएकी महिलाको कोठामा भेटिएका रक्सीका बोतल लगायतका सामग्रीसँग महराको फिंगरप्रिन्ट परीक्षणबाट तुलनात्मक रुपमा नमिलेको पनि फैसलामा उल्लेख छ ।

संसद सचिवालयकी महिला कर्मचारीमाथि उनकै निवासमा पुगेर जबरजस्ती करणीको प्रयास गरेको आरोप लागेपछि तत्कालीन सभामुख महराले गएको असोज १४ गते पदबाट राजीनामा दिएका थिए।

असोज १९ गते सभामुख निवासबाटै पक्राउ परेका महरा कात्तिक १८ गतेदेखि डिल्लीबजार कारागारमा पुर्पक्षका लागि थुनामा थिए ।

जिल्ला अदालत काठमाडौँका न्यायाधीश अमरराज पौडेलको इजलासले महरा निर्दोष रहेको फैसला गरेसँगै उनी आजै डिल्लीबजार कारागाबाट घर फर्किएका छन्।

पूर्वसभामुख महराले वक्तव्य जारी गर्दै कृष्णबहादुर महराले मुलुकको स्वाधीनताको रक्षा आफ्नो पहिलो र उच्‍च प्राथमिकतामा रहने बताएका छन् । उनले यो अवधिमा साथ र सहयोग गर्ने सवैप्रति धन्यवाद ज्ञापन व्यक्त गरेका छन् ।