काठमाडौं– डिभिजन सडक कार्यालय विराटनगरका तत्कालीन डिभिजन प्रमुख (सिनियर डिभिजनल ईन्जिनियर) जितेन्द्र कुमार चौधरीविरुद्ध झण्डै ४ करोड रुपैयाँ बराबरको भ्रष्टाचार मुद्दा दायर भएको छ ।

सार्वजनिक सेवामा रहँदा अकूत रुपमा सम्पत्ति आर्जन गरेको अभियोगमा अख्तियार दुरुपयोग अनुसन्धान आयोगले ईन्जिनियर चौधरीविरुद्ध सोमबार विशेष अदालत काठमाडौंमा भ्रष्टाचार मुद्दा दायर गरेको हो ।

अख्तियारका अनुसार ईन्जिनियर चौधरीले ३ करोड ९९ लाख ४४ हजार ३ सय ४२ रुपैयाँ बराबर अवैध रुपमा सम्पत्ति आर्जन गरेको देखिएको छ ।

अवैध रुपमा आर्जन गरिएको सम्पत्ति चौधरीले घर तथा जग्गामा लगानी गरेको, बैंकमा जम्मा गरेको तथा विभिन्न कामका लागि खर्च गरेको देखिएको अख्तियारले जनाएको छ ।

अख्तियारले चौधरीविरुद्ध ३ करोड ९९ लाख ४४ हजार ३ सय ४२ बिगो कायम गरी बिगोअनुसार जरिवाना र २ वर्षसम्म कैद सजाय मागदाबी गरेको छ ।

अख्तियारले अवैध रुपमा आर्जन गरेको सम्पत्ति जफत प्रयोजनका लागि चौधरीकी श्रीमती किरण चौधरी र छोरा अभिषेक चौधरीलाई समेत प्रतिवादी बनाएको छ ।