काठमाडौं – प्रधानमन्त्री केपी शर्मा ओलीले विकासको नयाँ अध्याय शुरु भएको उद्घोष गरेका छन ।

काठमाडौंबाट सुरु गरिएको विद्युत्, टेलिफोन र इन्टरनेटका तार भूमिगत कार्यक्रमको उद्घाटन गर्दै प्रधानमन्त्री ओलीले शहरी सौन्दर्यता अभिबृद्धिमा सरकार अघि बढेको जानकारी दिए ।

तार भूमिगत गर्ने कामले आम जनतालाई पनि सहज हुने र सेवा पनि सरल रुपमा प्राप्त गर्न सकिने उनको बिश्वास छ।

‘यो योजना सम्पन्न भएपछि गुजुल्टिएको तार हट्छ । अब शहर कुरुप हुँदैन, चिटिक्कको शहर बन्छ । पोलभरी गुजुल्टिएको तार देख्ने दिन अन्त्यका लागि यो काम भइरहेको छ ।’ प्रधानमन्त्री ओलीले भने, ‘विद्युत्, टेलिफोन लगायत तार भूमिगत गर्ने काम काठमाडौंको महाराजगञ्जबाट शुरु भए पनि यसलाई देशका प्रमुख शहरमा विस्तार गरिने छ।’

सरकारले विकास निर्माणको कामलाई प्रभावकारी रुपमा अगाडि बढाएको जानकारी दिँदै ओलीले केही मान्छेलाई सरकारको बिकास निर्माणको कामले पीर परेको आरोप समेत लगाए ।

उपत्यकामा विद्युतीय तार भूमिगत बनाउने महत्वाकाङ्क्षी परियोजना अन्तरगत पहिलो चरणमा काठमाडौँको महाराजगञ्ज र रत्नपार्क क्षेत्रमा तार भूमिगत गरिनेछ । यसलाई क्रमशः अन्यत्र विस्तार गरिँदै लैजाने सरकारको योजना छ ।