काठमाडौं – सहिद स्मारक ए डिभिजन लिगमा शीर्ष स्थानको मछिन्द्र क्लब पराजित हुँदै दोस्रो स्थानमा घटुवा भएको छ । शुक्रबार भएको खेलमा मछिन्द्र क्लव हिमालयन शेर्पासँग पराजित भएको हो ।

वर्षाका कारण दशरथरंगशालाबाट एन्फा मैदान सातदोबाटोमामा सारिएको खेलमा शेर्पाले मछिन्द्रमाथि २–० गोलको जीत हात पारेको हो ।

स्टार खेलाडीको बाहुल्यता रहेको मछिन्द्रको यो पहिलो हार हो भने कमजोर नतिजासहित लिगको पुछारभन्दा एक स्थान माथि रहेको शेर्पाले मछिन्द्रमाथि जित हात पारेको हो ।

खेलको पहिलो मिनेटमै मछिन्द्रका पिटर सेगुनले आत्मघाती गोल गर्दा शेर्पाले अग्रता बनाएको थियो भने २० औं मिनेटमा शेर्पाका विजय गुरुङले गोल गर्दै टिमलाई २–० को अवस्थामा पुर्‍याएका थिए ।

पहिलो जित हात पारेको शेर्पा ७ अंकसहित नवौं स्थानमा उक्लिएको छ भने हारसँगै मछिन्द्र दोस्रो स्थानमा झरेको छ । ७ खेलबाट १३ अंक जोडेको मछिन्द्र ६ खेलसहित १३ अंक रहेको आर्मीभन्दा पछि परेको हो ।