एजेन्सी- प्रिमियर लिग फुटबलमा लण्डन क्लब चेल्सी उल्भ्ससँग पराजित भएको छ ।

मंगलबार राति उल्भ्सले घरेलु मैदानमा चेल्सीलाई २–१ ले हराएको हो । सुरुवाती अग्रतालाई जोगाउन नसक्दा चेल्सीले पुन घरेलु लिगमा हार ब्यहोरेको छ ।

खेलमा अग्रता चेल्सीले ओलिभर जिराउडको गोलमा लिएको थियो । वेन चिलवेकको पासलाई सदुपयोग गर्दै जिराउडले लण्डन क्लबलाई अग्रता दिलाएका थिए ।

घरेलु टोली उल्भ्सका ड्यानियल पोडेन्सले ६६औँ मिनेटमा खेल बराबरीमा ल्याए । दोस्रो हाफको ईन्जुरी समयमा पेड्रो नेटोले गोल गर्दै चेल्सीलाई २–१ ले स्तब्ध पारे ।

चेल्सी घरेलु लिगमा लगातार दुई खेलमा पराजित बनेको छ । हारसँगै चेल्सी २२ अंकसहित तालिकाको पाँचौ स्थानमा छ । उल्भ्स २० अंकसहित शीर्ष १० मा उक्लिएको छ ।