काठमाडौँ- कांग्रेस सांसद गगन थापाले संसदभित्र पार्टीले दिएको छायाँ शिक्षामन्त्रीको हैसियतमा कोभिड संकटको समयमा विद्यालय शिक्षा निरन्तरता सम्बन्धमा विभिन्न सुझावसहित शिक्षामन्त्री गिरिराजमणि पोखरेललाई ध्यानाकर्षण पत्र बुझाएका छन् ।

थापाले सबै समुदायको अवस्था एउटै नरहेकाले विद्यालय सञ्चालन मापदण्ड बनाई स्थानीय सरकारहरूलाई स्वास्थ्य संस्थासँगको समन्वयमा संक्रमण न्यून रहेका समुदायका विद्यालय तत्काल सञ्चालन गर्ने, अनलाइन लगायतका वैकल्पिक विधिहरू प्रभावकारी बनाउन सुझाब दिएका छन् ।

उनले कुनै पनि प्रविधिको पहुँचमा नरहेका सीमान्तकृत समुदायका विद्यार्थीलाई सिकाइको विशेष प्याकेज ल्याउन पनि माग गरेका छन् । कोभिड—१९ संकट सुरु भएपछि गत वैशाखदेखि नै विद्यालयहरूमा पठनपाठन बन्द हुदा ८७ लाखभन्दा बढी विद्यार्थी घरैमा बस्न बाध्य छन् । वैकल्पिक तरिकाबाट सिकाइ अगाडि बढाउन गरिएका प्रयासहरू निकै सीमित विद्यार्थीमा मात्र पुग्न सकेको छ ।

सांसद थापाले २०७७ वैशाखको अन्तिम साता नै विज्ञ र सरोकारवालासँगको परामर्शमा ‘कोभिड–१९ को प्रभावको न्यूनीकरण गर्दै सबैका लागि सिकाइ’ शीर्षकको नीतिपत्र बुझाएका थिए । सरकारले असार १ गतेदेखि नै सिकाइ चालु गर्ने भनेर सिकाइ सहजीकरण निर्देशिका ल्याए पनि प्रभावकारी हुन सकेको छैन ।

हालै शिक्षा मन्त्रालय असोज १ देखि शैक्षिक सत्र सुरु गर्ने भन्दै नयाँ निर्देशिका ल्याएको छ । सांसद थापाले सो निर्देशिका माथि र अन्य थुप्रै सवालमा विज्ञ एवम सरोकारवालासँगको परामर्शबाट सुझावहरू तयार गरेको बताएका छन् ।

विद्यालय शिक्षा अगाडि बढाउन आवश्यक इच्छाशक्ति र तदारुकता सरकारले नदेखाएर शैक्षिक सत्र नै खेर जाने खतरा बढेकाले आफु थप चिन्तित बनेको थापाको भनाइ छ । उनले १३ वटा शीर्षकमा २१ वटा सुझाव दिएका छन् ।