काठमाडौँ— भारतले लिम्पियाधुरासहितको नेपाली भूमिमा आफ्नो सैन्य गतिविधि बढाएको छ ।

भारतीय सञ्चार माध्यमहरूका अनुसार चीनसँग सीमा क्षेत्रमा तनाव बढ्दै गएपछि लिपुलेक लगायतका क्षेत्रलाई लक्षित गर्दै भारतले लिम्पियाधुरा र कालापानी क्षेत्रमा सैन्य उपस्थिति बढाएको हो ।

भारतले नेपाली भूमि लिम्पियाधुरा, लिपुलेक र कालापानी क्षेत्रलाई पिथौरागढ जिल्लाअन्तर्गत राखेको छ । पिथौरागढसहितका तीन जिल्लामा हवाई प्रतिरक्षा राडार स्थापना गर्न लागेको भारतीय पत्रिका इन्डियन एक्सप्रेसको अनलाइन संस्करणले जनाएको छ ।

उत्तराखण्डका पिथौरागढ, उदिमसिंह नगर र चम्पावतको सीमा नेपालसँग जोडिएका छन् । चीनसँग सीमा जोडिएको चमोली र उत्तरकाशीमा पनि एयर डिफेन्स राडार राख्ने तयारी भारतले गरेको छ ।

उत्तरखण्ड राज्य सरकारले वायु प्रतिरक्षा राडारसँगै एडभान्स ल्यान्डिङ ग्राउन्डका लागि पनि भारतीय वायु सेनालाई जमिन उपलब्ध गराउने तयारी गरेको छ ।

भारतले गत वैशाख अन्तिममा नेपाली भूमि लिम्पियाधुरासहितको क्षेत्रबाट सडक निर्माण गरेपछि नेपालले कूटनीतिक नोट पठाएर सो कदमको विरोध गरेको थियो । पछि नेपालले उक्त क्षेत्र समेटर नयाँ नक्सा नै जारी गरिसकेको छ ।

भारतले भने नेपाली भूमिमाथिको अतिक्रमण त्यागेको छैन । भारतले कालापानी क्षेत्रमा मात्रै सैनिक र अर्धसैनिक बलका गरी ५ हजार जवान रहेको इन्डो—तिब्बत बोर्डर फोर्सको क्याम्प राखेको छ ।