काठमाडौं– राष्ट्रिय मानव अधिकार आयोगले कोरोना भाइरस संक्रमणबारे स्थानीय तहका जनप्रतिनिधिहरूलाई समयमै आवश्यक र यथेष्ट जानकारी गराउन आग्रह गर्दै सरकारलाई पत्र लेखेको छ ।

आयोगले प्रधानमन्त्री तथा मन्त्रिपरिषद्को कार्यालय, स्वास्थ्य तथा जनसंख्या मन्त्रालय र संघीय मामिला तथा सामान्य प्रशासन मन्त्रालयलाई पत्र लेखेको हो । आयोगका सचिव तथा प्रवक्ता वेद भट्टराईले आइतबार एक विज्ञप्ति जारी गरी उक्त कुरा जानकारी गराएका हुन् ।

कतिपय स्थानीय तहले आफ्नो क्षेत्रभित्र कहाँ र के कति संख्यामा संक्रमित रहेका छन् र परिवार तथा समुदायको संरक्षणका लागि के कस्तो पहल गर्नु पर्ने भन्ने जानकारी प्राप्त हुन नसकेको गुनासो गरेको आयोगको विज्ञप्तिमा जनाइएको छ ।

आफ्नो इलाकाभित्र कोरोना संक्रमण भएका व्यक्तिहरूको सूचना जनस्वास्थ्य कार्यालय तथा स्वास्थ्य मन्त्रालयबाट प्राप्त हुन नसकेको गुनासो स्थानीय तहहरूको छ ।

आयोगले स्वास्थ्य तथा जनसंख्या मन्त्रालयले हरेक दिन संक्रमणको अवस्थाका सन्दर्भमा जानकारी गराउँदा काठमाडौं लगायत अन्य ठूला शहरहरूको कुन क्षेत्र र व्यवसायका व्यक्तिहरूमा संक्रमण देखियो भन्ने प्रष्ट पार्न सुझाव दिएको छ । यसो गर्दा स्थानीय तहहरूलाई थप सजगता अपनाउन मद्दत मिल्ने आयोगको भनाइ छ ।

आयोगले संक्रामक रोग समुदायमा स्तरमा फैलिनबाट रोक्न तथा आम नागरिकको स्वास्थ्यको अधिकार र भयरहित वातावरणमा बाँच्न पाउने अधिकार संरक्षणका लागि संवेदनशील हुन पनि नेपाल सरकारलाई आग्रह गरेको छ ।