काठमाडौं- सत्तारुढ नेपाल कम्युनिस्ट पार्टी भित्रको विवाद समाधान गर्न दुई अध्यक्ष छलफलमा जुटेपनि सचिवालयका बहुमत सदस्यले प्रधानमन्त्री केपी शर्मा ओलीलाई दबाव दिँदै स्थायी कमिटी बैठकलाई निरन्तरता दिने निष्कर्ष निकालेको छ ।

बिहान ९ बजेदेखि २ घण्टा भन्दा बढी प्रचण्डनिवास खुमलटारमा बसेको बैठकले जसरी पनि स्थायी कमिटी बैठकलाई अघि बढाउने निर्षकर्ष निकालेको एक सचिवालय सदस्यले जानकारी दिए । खुमलटार बैठकमा प्रचण्ड, नेता झलनाथ खनाल, माधव नेपाल, वामदेव गौतम, नारायणकाजी श्रेष्ठ र रामबहादुर थापा सहभागि थिए ।

खुमलटार बैठकपछि अहिले बालुवाटारमा ओलीसहित प्रचण्ड र माधव नेपाल छलफलमा जुटेका छन् । छलफलका क्रममा प्रचण्ड र नेपालले खुमलटार बैठकको निष्कर्षका विषयमा ओलीलाई जानकारी गराइने ती नेताले बताए ।

बैठकमा सहभागि नेताले भने, ‘भोलिदेखि स्थायी कमिटी बैठक चल्ने छ । त्यसका लागि अध्यक्ष ओलीलाई दबाव दिइने छ । स्थायी कमिटीको बैठक कुनै हालतमा रोक्नु हुँदैन भन्‍ने हाम्रो निष्कर्ष निस्किएको छ।’

गत असार १० गतेदेखि सुरु भएको बैठक १६ गतेदेखि अवरुद्ध रहँदै आएको छ ।