काठमाडौं- बैशाख महिनामा विप्रेषण आप्रवाह ६ प्रतिशतले घटेको छ ।

नेपाल राष्ट्र बैंकले मंगलबार सार्वजनिक गरेको देशको वर्तमान आर्थिक तथा वित्तिय अवस्थासम्बन्धी प्रतिवेदन अनुसार चालु आर्थिक वर्षको १० महिनाको अवधिमा विप्रेषण आप्रवाहमा ६ दशमलब १ प्रतिशतले कमी आएको हो ।

चालु आर्थिक वर्षको १० महिनाको अवधीमा विप्रेषण आप्रवाहमा कमी आई ६ खर्ब ८४ अर्ब कायम भएको छ ।

अघिल्लो वर्षको सोही अवधिमा विप्रेषण आप्रवाह १९ दशमलब ६ प्रतिशतले बढेको राष्ट्र बैंकले जनाएको छ ।

यसै अवधिमा मुल्य वृद्धि उकालो लागेको राष्ट्र बैंकले जनाएको छ । चालु आर्थिक वर्षको १० महिनाको अवधिमा मुद्रास्फिती ६.४६ प्रतिशत पुगेको छ ।

अघिल्लो वर्षको सोही अवधिमा मुद्रास्फिती ५ दशमलब ८६ प्रतिशत थियो । यस्तै यसै अवधिमा खाद्य तथा पेय पदार्थको उच्च मुल्य वृद्धि भएको राष्ट्र बैंकले जनाएको छ ।

यस अवधिमा खाद्य पदार्थको मुद्रास्फिती ८ दशमलब ६६ प्रतिशत तथा गैरखाद्य पदार्थको मुद्रास्फिती ३ दशमलब ६७ प्रतिशत रहेको छ । यस अवधिमा शोधनान्तर १ खर्ब २० अर्ब बचतमा रहेको राष्ट्र बैंकले जनाएको छ ।

चालु आर्थिक वर्षको १० महिनाको अवधिमा वैदेशिक व्यापार तर्फ आयात १३ दशमलब २ प्रतिशतले घट्दा निर्यात ४ दशमलब ५ प्रतिशतले बढेको राष्ट्र बैंकले जनाएको छ ।

यस अवधिमा ८२ अर्ब ६ करोडको वस्तु निर्यात हुँदा आयात १३ प्रतिशतले कमी आई १० खर्ब २५ अर्ब भएको नेपाल राष्ट्र बैंकले जनााएको छ ।