वीरेन्द्रनगर– कर्णाली प्रदेशमा २ जना कोरोना संक्रमित भेटिएको छन् । सुदूरपश्चिमको धनगढीस्थित प्रयोगशालाको रियल टाइम पीसीआर मेसिनबाट परीक्षणको क्रममा रुकुमको चौरजहारी नगरपालिको क्वारेन्टाइनमा रहेका २ जना पुरुषमा कोरोना संक्रमण देखिएको हो ।

केही दिन अगाडि कर्णाली प्रादेशिक अस्पताल सुर्खेतले संकलित नमूनाको परीक्षणका लागि सुदूरपश्चिमको धनगढीस्थित पशुपंक्षी अन्वेषण प्रयोगशालामा पठाएको थियो ।

कर्णाली प्रदेशको स्वास्थ्य निर्देशनालयकी निर्देशक रिता भण्डारीका अनुसार परीक्षणका लागि ९९ जनाको स्वाबको नमूना वैशाख १ गते धनगढी पठाइएको थियो । जसमध्येका २ जनाको रिपोर्ट पोजेटिभ आएको भण्डारीले जानकारी दिइन् ।

उनका अनुसार ३६–३६ वर्षका दुवै जना पुरुषमा पीसीआर टेस्टका क्रममा कोरोना संक्रमण देखिएको हो । उनीहरु केही समय अघि भारतबाट आएका थिए ।

उनीहरु अहिले रुकुमको चौरजहारी सामुदायिक अस्पतालको आइसोलेनमा उपचारत छन् । उनीहरु भारतबाट सार्वजनिक बसमा आएका थिए ।

स्वास्थ्य निर्देशनालयकी निर्देशक भण्डारीले धनगढीमा परीक्षण गर्दा दुवै जनाको रिपोर्ट पोजेटिभ आएपछि थप यकिनका लागि दुवै जनाको स्वाब काठमाडौंको राष्ट्रिय जनस्वास्थ्य प्रयोगशालामा पठाइएको बताइन् ।