काठमाडौं– अख्तियार दुरुपयोग अनुसन्धान आयोगले आफ्नो हिरासतमा रहेका थप ४ जना आरोपीलाई रिहा गरेको छ ।

कोरोना भाइरस (कोभिड १९) संक्रमणको जोखिमलाई मध्यनजर गर्दै कसुरको गाम्भीर्यता समेत हेरी ४ जना आरोपीलाई हिरासतबाट मुक्त गरिएको अख्तियार दुरुपयोग अनुसन्धान आयोगका केन्द्रीय प्रवक्ताले प्रदीप कुमार कोइरालाले जानकारी दिए ।

प्रवक्ता कोइरालाका अनुसार ४ जना आरोपीलाई धरौटी लिएर रिहा गरिएको हो ।

अख्तियारले यसअघि पनि आफ्नो हिरासतमा रहेका मध्ये ८ जना आरोपीलाई धरौटी लिएर हिरासतमुक्त गरेको थियो ।
सरकारले समेत कोरोना भाइरस संक्रमणको जोखिमलाई कम गर्न भन्दै जघन्य प्रकृतिको अपराध बाहेकका घटनामा संलग्न अभियुक्तलाई धरौटी तथा तोरखमा रहने गरी थुनामुक्त गर्दै आएको छ ।