काठमाडौं- सभामुख अग्निप्रसाद सापकोटाले सबै राजनीतिक दलका बिचमा सहमति कायम भएपछि मात्र एमसीसी संसदमा टेवल गर्ने बताएका छन् ।

आज सिंहदरबारमा संसद मामिला रिपोर्टिङ गर्ने पत्रकारहरुसँगको अन्तक्रियामा सभामुख सापकोटाले सबै राजनीतिक दलका नेता, संसदीय दलका सचेतक लगायत निष्कर्षमा पुगेपछि आफूले सहजीकरण मात्रै गर्ने बताएका हुन् ।

उनले कोरोना भाइरसका कारण एमसीसीको विषयमा भइरहेको बहस नसुनिएको जस्तो भएको भन्दै निरन्तर बहस भइरहेको समेत बताएका छन् ।

उनले भने,‘त्यो त छलफलमा छ । पारित गर्ने कुरा भएपछि सत्तारुढ दल, पार्टीका नेताहरु, दलका नेता, उपनेता, विभिन्न पार्टीका मुख्य सचेतकहरुका बिचमा पनि छलफल चलिरहेको छ । राष्ट्रिय रुपमा पनि छलफल चलिरहेको छ । मैले त सहजीकरण गर्ने कुरा न हो ।’

सभामुख सापाकोटाले राजनीतिक दलले उपसभामुख उम्मेदवारको टुंगो लगाएपछि प्रक्रिया शुरु गर्ने, कार्यतालिका सार्वजनिक गर्ने समेत बताएका छन् ।