काठमाडौं– गृह मन्त्रालयले २६ जिल्लाका प्रमुख जिल्ला अधिकारी (सीडीओ) हेरफेर गरेको छ ।

सहसचिवका दरबन्दी हुने जिल्लाहरूमा आइतबार सिडिओको हेरफेर भएको हो । कास्कीमा ज्ञानप्रसाद ढकाल, धनुषामा कोषहरि निरौला तथा मकवानपुरको सिडिओमा दीपकराज नेपालको सरुवा भएको छ ।

धनकुटामा केशवप्रसाद विमली, अछाममा पुण्यविक्रम पौडेल, नवलपरासी पश्चिममा वासुदेव दाहाल, सिन्धुलीमा योगेन्द्रप्रसाद पाण्डे, पाँचथरमा अर्जुनकुमार शर्माको सरुवा भएको छ। गुल्मीमा भरतकुमार शर्मा, बारामा रुद्रप्रसाद पण्डित, तनहुँमा बद्रीनाथ अधिकारीलाई सिडिओ बनाइएको छ ।

कास्कीमा सिडिओ रहेका रमेशकुमार केसीलाई अध्यागमन विभाग तथा धनुषाका सिडिओ प्रदीपराज कँडेललाई कारागार व्यवस्था विभागको महानिर्देशकमा सरुवा गरिएको छ । मकवानपुरका नारायणप्रसाद भट्ट तथा बाराका सिडिओ फणिन्द्रमणि पोखरेलको गृह मन्त्रालयमा सरुवा भएको छ ।

सहसचिव हीरालाल रेग्मी र हरिप्रसाद घिमिरे, गोपालकुमार अधिकारीको राष्ट्रिय विपद् जोखिम न्यूनीकरण तथा विपद् न्यूनीकरण प्राधिकरणमा पदस्थापन भएको छ ।

केही उपसचिवहरूको पनि सरुवा भएको छ। डा. कृष्ण घिमिरेलाई सहायक प्रजिअ मोरङ, अनुज भण्डारीलाई सिराहा, मुरारी वस्ती र जनार्दन गौतमको राष्ट्रिय विपद् जोखिम न्यूनीकरण तथा व्यवस्थापन प्राधिकरण र भोजराज श्रेष्ठको सहायक सिडिओका रूपमा धनकुटा सरुवा गरिएको मन्त्रालयले जनाएको छ ।