काठमाडौं – अर्मेनियाका प्रधानमन्त्री निकोल पाशिन्यानको हत्याको प्रयास गरिएको छ । अर्मेनिया पूर्व अधिकारीहरुको समूहले पाशिन्यानको हत्या गर्ने र शक्ति आफ्नो हातमा लिने प्रयास गरेको अर्मेनियाको नेशनल सेक्युरिटी सर्भिस (एनएसएस)ले दाबी गरेको छ ।

अर्मेनियामा गत मंगलबारदेखि प्रधानमन्त्रीको राजीनामाको माग गर्दै हजारौंले प्रदर्शन गरिरहेका छन् ।

अजरबैजानसँगको विवादित भूमि नागोर्नो काराबखबारे जारी युद्धपछि भएको युद्धविराम सम्झौतामा आपत्ति जनाउँदै प्रदर्शनकारीहरुले प्रधानमन्त्रीविरुद्ध प्रदर्शन गरेका हुन् । ६ सातासम्म चलेको उक्त युद्धमा अर्मेनियाले उक्त विवादित भूमिको केही स्थानको नियन्त्रण गुमाएको बताइएको छ ।

शनिबार एक विज्ञप्ति जारी गर्दै आफ्ना पूर्व प्रमुख अर्टुर वनेत्स्यानसहित तीनजनालाई नियन्त्रणमा लिइएको एनएसएसले बताएको छ । पक्राउ गरिएकाहरुले पाशिन्यानको हत्या गर्ने प्रयास गरेको र शक्ति आफ्नो हातमा लिने दाउ रहेको एनएसएसले जनाएको छ ।

गत साता पाशिन्यानले आफ्नो नियन्त्रणमा रहेका अझै अरु भूमिहरु नगुमाउन आफूसँग रुसले गराएको यो सम्झौतामा हस्ताक्षर गरेको बताएका थिए ।

नागोर्नो काराबख अन्तर्राष्ट्रिय रुपमा अजरबैजानको भूमि भए पनि यो क्षेत्रमा अर्मेनियाको नियन्त्रण रहँदै आएको छ । उक्त विवादित क्षेत्रमा यतिबेला दुई हजार रुसी शान्ति सेना परिचालन गरिएको छ ।