काठमाडौं- कोरोनाभाइरस संक्रमण भएका २८ जना भेन्टिलेटरमा उपचाररत रहेको स्वास्थ्य तथा जनसंख्या मन्त्रालयले जनाएको छ ।

मन्त्रालयका प्रवक्ता डा. जागेश्वर गौतमले मंगलबारको नियमित लाइभ अपडेटमा दिएको जानकारीअनुसार बाग्मती प्रदेशमा मात्र २५ जना कोरोना संक्रमित भेन्टिलेटरमा छन् ।

यसैगरी प्रदेश १, प्रदेश ५ र सुदूरपश्चिम प्रदेशमा १-१ जना भेन्टिलेटरमा रहेको डा. गौतमले जानकारी दिए ।

आईसीयूमा रहेका संक्रमितको संख्या भने १७४ छ । हालसम्म कोरोना संक्रमितको कुल संख्या भने ५६ हजार ७८८ पुगेको छ ।

२४ घण्टामा थप १ हजार ४५९ जनामा संक्रमण पुष्टि भएको पत्रकार सम्मेलनमा जानकारी दिइयो । संक्रमितमध्ये ४० हजार ६ सय ३८ जना निको भएर घर फर्किएको प्रवक्ता डा. गौतमले जानकारी दिए ।

पछिल्लो २४ घण्टामा १ हजार ६२ जना डिस्चार्ज भएको प्रवक्ता गौतमले बताए । मृतकको संख्या भने ३७१ पुगेको छ । पछिल्लो २४ घण्टामा ११ जनाको मृत्यु भएको छ ।

स्वास्थ्य मन्त्रालयको तथ्यांक