काठमाडौं– कपिलवस्तुका एक जना कोरोना संक्रमितको उपचारका क्रममा मृत्यु भएको छ ।

जिल्ला स्वास्थ्य कार्यालय कपिलवस्तुका कोरोना सम्पर्क व्यक्ति कुमार थापाका अनुसार लुम्बिनी प्रादेशिक अस्पताल वुटवलमा उपचारत एक जना कोरोना संक्रमितको मृत्यु भएको हो । मृत्यु भएका पुरुष कपिलवस्तुको मायादेवी–७ का ४० वर्षका पुरूष हुन् ।

श्वासप्रश्वासमा समस्या देखिएका उनमा कोरोनासँग मिल्दा लक्षण पनि देखिएपछि गत बुधबारबाट लुम्बिनी प्रादेशिक अस्पतालमा भर्ना गरिएको थियो ।

‘कपिलवस्तुका एकजना कोरोना संक्रमितको मृत्यु भएको हो, थापाले खबरहबसँग भने, ‘उहाँमा कोरोनाको लक्षण तथा श्वासप्रश्वासको समस्या भएर अस्पतालमा लगिएको थियो, आज बिहान ४ बजे मृत्यु भयो, बिहान नै रिपोर्ट पनि पोजेटिभ आयो ।’

थापाका अनुसार ती पुरुष ४ महिनाअघि भारतबाट नेपाल फर्किएका थिए । ‘उहाँ कपिलवस्तुकै स्थानीय हो, ४ महिना अघि भारतबाट आउँदा कोरोना नेगेटिभ थियो,’ थापाले भने, ‘तर अहिलेचाँही बिरामी पर्नुभयो, उपचारको क्रममा मृत्यु नै भयो, कोरोना पनि पोजेटिभ देखियो ।’

कपिलवस्तुमा कोरोना संक्रमण फैलिएको अवस्था छ । भारतबाट फर्किदा कोरोना संक्रमण नदेखिएकोमा उनमा कपिलवस्तुमै आएपछि संक्रमण फैलिएको थापाले बताए ।