काठमाडौं – सरकारले दुई प्रहरी नायब महानिरीक्षक (डीआईजी)लाई अतिरिक्त महानिरीक्षक (एआईजी)मा बढुवा सिफारिस गरेको छ।

गृह मन्त्रालयमा बुधबार बसेको बढुवा समितिको बैठकले डीआईजीद्वय नीरजबहादुर शाही र प्रद्युम्नकुमार कार्कीलाई एआईजीमा बढुवा सिफारिस गरेको हो।

समिति संयोजक गृहसचिव महेश्वर न्यौपाने, सदस्यसचिव प्रहरी महानिरीक्षक शैलेश थापा क्षेत्री र लोकसेवा आयोगका सदस्यसहितको बैठकले उनीहरुलाई बढुवा सिफारिस गरेको हो ।

तत्कालीन प्रहरी महानिरीक्षक ठाकुरप्रसाद ज्ञवाली र एआईजी तारणी लम्सालले अनिवार्य अवकाश पाएका थिए। त्यसपछि रिक्त महानिरीक्षक पदमा क्षेत्रीको बढुवा भएपछि दुई एआईजी दरबन्दी खाली थियो।

बढुवा सिफारिसमा परेका शाही र कार्की दुवै महानिरीक्षक क्षेत्रीकै ब्याचका हुन्।

प्रहरी नियमावली, २०७१ (संशोधनसहित) को नियम २७ को उप–नियम (४) को प्रावधानअनुसार उनीहरुलाई बढुवाका लागि सिफारिस गरिएको हो ।

शाही प्रहरी प्रधान कार्यालय महानिरीक्षकको सचिवालय र कार्की प्रहरी प्रधान कार्यालयकै विशेष व्यूरोमा कार्यरत छन् ।

बढुवा सिफारिस सूची