मुम्बई – दक्षिण भारतीय फिल्म ‘बाहुबली’ ले विश्वभर नै धमाका मच्चायो । फिल्म मात्र हिट भएन, फिल्ममा मुख्य भूमिका निभाएका पात्रहरुको पनि खुबै चर्चा भयो ।

यो फिल्ममा श्रीदेवीलाई शिवगामीको भूमिका निभाउन प्रस्ताव गरिएको थियो । तर, उनले अस्वीकार गरेकी थिइन् । पछि यो भूमिका राम्य कृष्णनले निभाएकी थिइन् ।

जबकि, श्रीदेवीलाई शिवगामीको भूमिका निभाउन प्रस्ताव गर्न निर्देशक एसएस राजामौली श्रीदेवीको मुम्बईस्थित घर पुगेका थिए ।

श्रीदेवीलाई पनि फिल्ममा आफ्नो भूमिका र कहानी उत्तिकै मन परेको थियो । उनी पहिलेदेखि नै राजमौलीको कामप्रति प्रभावित थिइन् ।
अर्कातिर तेलुगु सुपरस्टार प्रभास पनि फिल्ममा अनुबन्ध भएका थिए ।

श्रीदेवीले तत्कालै यो फिल्ममा आफूले काम गर्ने बताइन् । राजामौली पनि खुशी हुँदै हैदराबाद फर्किए । उनले आफ्नो टिमलाई पनि यसबारेमा जानकारी दिए ।

लगत्तै राजामौलीलाई श्रीदेवीको टिम मेम्बरबाट फोन आयो कि, श्रीदेवीले यसबारेमा कुरा गर्न चाहन्छिन् ।

राजामौली आफ्नो काम छोडेर बीचमा मुम्बई आइपुगे । यसपटक मिटिङमा श्रीदेवीसँग पति बोनी कपूर पनि थिए । उनले शर्तको लामो लिस्ट तयार पारे ।

श्रीदेवीका पतिले हिरोलाई भन्दा पनि बढी पारिश्रमिक दिनुपर्ने बताए । साथै शूटिङका दौरान पूरै स्टार होटल बूक गर्नुपर्ने पनि उनले बताए ।

यति मात्र नभएर फिल्मको नाफा पनि शेयर गर्नुपर्ने उनले राजामौलीलाई प्रस्ताव गरे । यता श्रीदेवी भने पूरै मिटिङका दौरान चुप रहिन् ।

राजामौली हैदराबाद फर्किए । राजामौलीले जाने बेला श्रीदेवीलाई भनेका थिए, ‘तपाईंलाई त यो भूमिका मन परेको थियो त, फेरि यति धेरै शर्त किन राख्नुभयो ?’

राजामौलीले फिल्म हिट भयो भने श्रीदेवीलाई पनि फाइदा हुनसक्ने बताए । जवाफमा बोनी कपूरले श्रीदेवीले अभिनय नगरे फिल्म नै असफल हुन पनि सक्ने प्रतिक्रिया दिए ।

यद्यपि फिल्म बन्यो । पछि फिल्म यति हिट भयो कि, फिल्मले बलिउडमा पनि धमाका मच्चायो । पछि एक कुराकानीका क्रममा श्रीदेवीले भनेकी थिइन् – मैले निकै राम्रो भूमिका गुमाएँ । पैसा त पाइन्छ तर राम्रो भूमिका र राम्रो फिल्म बारम्बार पाइँदैन ।