काठमाडौं – कोरोना भाइरसको संक्रमण फैलन नदिन फ्रान्सले लगाएको अधिकांश प्रतिबन्ध फुकुवा गरेको छ ।

देशबासीलाई टेलिभिजनबाट सम्बोधन गर्दै  राष्ट्रपति इम्यानुएल म्याक्रोँले कोरोना भाइरसको संक्रमण फैलिन नदिन यसअघि लागु गरिएका अधिकांश प्रतिबन्ध आजदेखि लागु हुने गरी फुकुवा गरिएको घोषण गरेका छन् ।

उक्त घोषणासँगै फ्रान्समा क्याफे तथा रेस्टुरेन्टहरु खुल्ने भएका छन् । यस्तै युरोपका अरु देशमा यात्रा गर्न पनि पाइने भएको छ ।

केयर होममा रहेका आफन्तहरुसँग भेटघाट गर्न पनि पाइने भएको छ । कोरोना भाइरसको महामारीका कारण सबैभन्दा बढी केयर होमहरु प्रभावित भएका थिए ।

युरोपका अरु देशहरुले पनि सोमबारदेखि सीमा खुला गरेका छन् । यद्यपि कोरोना भाइरसको संक्रमण पुनः फर्किन सक्ने भन्दै उनले सावधानी अपनाउन देशवासीलाई अपिल गरेका छन् ।

उक्त घोषणासँगै अब जुन २२ देखि विद्यालय पनि पनि सञ्चालनमा आउने छन् भने मार्च महिनामा हुने निर्धारण गरिएको स्थानीय तहहरूको दोस्रो चरणको निर्वाचन जुन २८ तारिखमा गरिने माक्रोँले जनाएका छन् ।

कोरोना भाइरसका संक्रमित बढेपछि फ्रान्समा मार्च १७ तारिखदेखि लकडाउन कडा गरिएको थियो ।