काठमाडौं- राष्ट्रपति विद्यादेवी भण्डारीले आगामी आर्थिक वर्षका लागि संघीय संसदको संयुक्त सदनमा नीति तथा कार्यक्रम प्रस्तुत गर्दै छन् ।

आगामी आर्थिक वर्षको नीति तथा कार्यक्रम प्रस्तुत गर्न दिउँसो चार बजे स‌ंसद बैठक बस्दैछ ।

संसदमा प्रवेश गर्न सांसदहरुलाई मास्क अनिवार्य गरिएको छ । सिट व्यवस्थापन दूरी कायम गरी मिलाइएको छ । संसद सचिवालयले राष्ट्रपति, प्रधानमन्त्री, सांसदहरु र तिनका सचिवालयका सदस्यहरुको कोरोना परीक्षण गरिसकेको छ ।

राष्ट्रपति भण्डारी संसदमा आउँदा यसपटक पुष्पगुच्छा नदिइने भएको छ । राष्ट्रपतिलाई नमस्कार गरेर स्वागत गरिनेछ । आउने १५ जेठमा आगामी आर्थिक वर्षका लागि बजेट आउँदैछ ।

सिंगारियो संसद भवन

सामान्य अवस्थामा नीति कार्यक्रम तथा बजेट प्रस्तुत हुने दिन भवनलाई झकिझकाउका साथ सजाउने पुरानै परम्परा हो। तर यस वर्ष महामारीका बीच पनि संसद सचिवालयले राष्ट्रपति भण्डारीको सम्मानमा संसद भवन सिँगारेको छ।

कोरोनाबाट बच्न विश्व स्वास्थ्य संगठन र स्वास्थ्य मन्त्रालयले जारी गरेको निर्देशनलाई पालना गर्दै गरिएको संसद सचिवालयले जनाएको छ। बैठकभित्र छिर्ने बेला साबुन पानीले हात हुने, ज्वरो परीक्षण गर्ने, मास्कपञ्जा लगाउनेदेखि दुईवटा कुर्सी खाली राखेर सांसदहरु बस्ने व्यवस्था मिलाइएको छ।

आम चुनावपछि नेकपा नेतृत्वको सरकारले संसदमा तेस्रो पटक आफ्नो नीति तथा कार्यक्रम प्रस्तुत गर्न लागेको हो। यसवर्षको नीति तथा कार्यक्रम कोरोना महामारीपछिको अर्थतन्त्र पुनरुत्थानमामा केन्द्रित रहनेछ।