काठमाडौं– गण्डकी प्रदेशमा र्‍यापिड डाइग्नोस्टिक टेस्ट (आडीटी)मार्फत गरिएको परीक्षणमा एन्टिबडी पोजेटिभ देखिएका ३ जनामध्ये १ जनाको पीसीआर रिपोर्ट नेगेटिभ आएको छ ।

गण्डकी प्रदेश, सामाजिक विकास मन्त्रालयको स्वास्थ्य महाशाखाका प्रमुख डा रामबहादुर केसीका अनुसार आरडीटी परीक्षणका क्रममा बाग्लुङ, कास्की र गोरखाका गरी ३ जनामा कोरोना संक्रमणको संकेत (एन्डिबडी) पोजेटिभ देखिएको थियो । जसमध्येका बाग्लुङका एक युवकको पीसीआर विधिबाट गरिएको परीक्षणको नतिजा नेगेटिभ देखिएको हो ।

‘आरडीटी पोजेटिभ देखिएकामध्ये बाग्लुङका युवकको पीसीआर रिपोर्ट नेगेटिभ आएको छ । यसको मतलब उनमा कोरोनाको संक्रमण छैन भन्ने हो,’ डा केसीले भने ।

यस्तै, आरडीटी परीक्षणका क्रममा एन्टिबडी पोजेटिभ देखिएका कास्की र गोरखाको युवकको भने पीसीआर रिपोर्ट आइसकेको छैन ।

कास्कीका युवकको थ्रोट स्वाब संकलन गरी परीक्षणका लागि ल्याब पठाइसकिएको र गोरखाका युवकको स्वाब पोखरा आइपुगि नसकेको केसीले जानकारी दिए ।