काठमाडौं– महोत्तरीको बर्दिबास नगरपालिकाअन्तर्गत पर्ने जंगलमा लागेको आगोमा परेर १ जनाको मृत्यु भएको छ ।

बर्दिबास नगरपालिका–१० स्थित सरस्वती सामुदायिक वनको जंगलमा लागेको आगोमा परेर सोही ठाउँका ७० वर्षीय हर्क बहादुर बाईबाको मृत्यु भएको हो ।

गाउँबाट आफ्नो घर जान हिँडेका उनको बाटोमा पर्ने जंगलमा लागेको आगोमा जलेर मृत्यु भएको जिल्ला प्रहरी कार्यालय महोत्तरीले जानकारी दिएको छ ।

यस्तै, मकवानपुर, उदयपुर, बारा र बर्दियामा पनि आगलागीबाट विभिन्न धनमाल जलेर नष्ट भएको छ ।

प्रहरी प्रधान कार्यालयका अनुसार मकवानपुरको बाग्मती गाउँपालिका–५ ज्यामिरे बस्ने मंगल परियारको घर र गोठमा मंगलबार दिउँसो आगलागी हुन ५० हजार रुपैयाँ बराबरको धनमाल जलेर नष्ट भएको छ ।

उदयपुरको त्रियुगा नगरपालिका–१६ साईखोला बस्ने प्रेमबहादुर राउतको गोठमा विद्युत सर्ट भइ आगलागी हुँदा ५ लाख रुपैयाँ बराबरको क्षति भएको छ ।

बाराको निजगढ नगरपालिका–३ सिगौंल बस्ने पोतेमान गोलेको घरमा मंगलबार बिहान आगलागी हुँदा ३ लाख १५ हजार रुपैयाँ बराबरको धनमाल क्षति भएको छ ।

यस्तै, बर्दियाको बारबर्दिया नगरपालिका–५ मगरागढी बस्ने मीन राज गिरीको गोठमा मंगलबार राति आगलागी हुँदा २ लाख ५० हजार रुपैयाँ बराबरको धनमाल जलेर नष्ट भएको छ ।