काठमाडौं– विश्वव्यापी महामारीको रुप लिएको कोरोना भाइरसविरुद्ध लड्न साझा रणनीति बनाउने भनेर सार्क सदस्य राष्ट्रका नेताहरुको भिडियो सम्मेलन (कन्फरेन्स)मा पाकिस्तानी प्रधानमन्त्री इमरान खान अनुपस्थित भएका छन् ।

भारतीय प्रधानमन्त्री नरेन्द्र मोदीको विशेष आह्वानमा सार्क सदस्य राष्ट्रका नेताहरुबीच आइतबार साँझ ५ः१५ बजेदेखि भिडियो सम्मेलन शुरु भएको थियो ।

भिडियो सम्मेलनमा नेपालका प्रधानमन्त्री केपी शर्मा ओली, भारतीय प्रधानमन्त्री नरेन्द्र मोदी, बंगलादेशकी प्रधानमन्त्री शेख हसिना, अफगानिस्तानका राष्ट्रपति असरफ घानी, माल्दिभ्सका राष्ट्रपति इब्राहिम मोहम्मद सोलिह, बंगलादेशका प्रधानमन्त्री लोटे छिरिङ र श्रीलंकाका राष्ट्रपति गोतापाया राजापाक्षे सहभागी भएका छन् ।

पाकिस्तानका प्रधानमन्त्री खान भने भिडियो कन्फरेन्समा सहभागी भएनन् । उनले राज्यमन्त्री तहका स्वास्थ्य मामिलाका आफ्ना सल्लाहकार डा जाफर मिर्जालाई कन्फरेन्समा सहभागी हुन लगाए ।