दोहा– अफगानिस्तानमा युद्धरत लडाकु समूह तालिबान र अमेरिकाबीच एक साताका लागि हिंसा अन्त्य गर्ने सम्झौता भएको छ ।

कतारको राजधानी दोहामा अमेरिकी तथा तालिबानको राजनीतिक समूहबीच जारी वार्ताका क्रममा अफगानिस्तानमा एक साताका लागि हिंसा रोक्ने सम्झौता भएको हो ।

जर्मनीको म्युनिखमा आयोजित एक सुरक्षा सम्मेलनमा अफगान राष्ट्रपति अशरफ घानी र अमेरिकी रक्षामन्त्री मार्क एस्पर एवं अमेरिकी विदेशमन्त्री माइक पोम्पेओबीच भेटवार्ता भएलगत्तै अमेरिका र तालिबानबीच भएको सम्झौता सार्वजनिक गरिएको हो ।

हिंसा अन्त्य गर्ने साता लामो समयावधि तत्काल शुरु नभइसकेपनि चाँडै शुरु हुने अमेरिकी अधिकारीलाई उद्धृत गर्दै समाचार संस्था रोयटर्सले जनाएको छ । यो सम्झौता पालना भएको खण्डमा अमेरिकाले १८ वर्ष देखि युद्धग्रस्त रहेको अफगानिस्तानबाट आफ्नो सेना फिर्ता लैजान बाटो खुल्ने जनाइएको छ ।

यद्यपि तालिबानले यो सम्झौताको पालना गर्छ गर्दैन भन्ने विषयले अमेरिकी सेना फिर्तीको सम्झौता निर्धारण गर्ने अन्तर्राष्ट्रिय सञ्चारमाध्यमले जनाएका छन् । यसअघि अमेरिकाले आफ्नो सेना फिर्ता लैजानेगरी यही फेब्रुअरी महिनाको अन्त्यसम्म सम्झौता भइसक्ने समाचार सार्वजनिक भएको थियो ।

यो सम्झौताबारे अफगान सरकार वा तालिबानबाट भने कुनै टिप्पणी सार्वजनिक भइसकेको छैन ।