चितवन – गृहमन्त्री रामबहादुर थापाले पार्टीभित्रको मतभेदले सरकार र पार्टीलाई थप सुदृढ गर्ने बताएका छन् ।

आज यहाँ प्रेस सङ्गठन चितवनले आयोजना गरेको पत्रकार सम्मेलनमा उनले पछिल्लो समय कोभिड–१९ ले उत्पन्न गरेको सङ्कटबाट संविधानविरोधी शक्ति व्यवस्था र संविधानलाई उल्ट्याउने अवसर आएको निष्कर्षमा पुगे पनि तिनको सपना पूरा नहुने दाबी गरे ।

साथै उनले अहिलेको व्यवस्था र सरकार विरोधी गतिविधि केही समूहको मृगतृष्णा भएको दाबी गरेका छन् ।

गृहमन्त्री थापाले नेपाली जनताले त्यस्ता शक्तिको सपना कहिल्यै पूरा हुन नदिने बताए । उनले नेकपामा देखिएको मतभेदले सरकार र पार्टीलाई अझ सुदृढ गर्ने पनि बताए ।

“यो मतभेदले सरकार र पार्टीलाई अझै बढी सुदृढ गर्छ,” उनले भने ।

अहिलेको जारी स्थायी कमिटीको बैठकले पार्टीभित्रको समस्या समाधान गर्ने विश्वास पनि व्यक्त गरे । उनले पार्टीभित्रको अन्तरविरोध स्वभाविक प्रक्रिया भएको समेत बताए ।