काठमाडौं- तिहारको तेस्रो दिन (आज) साँझ नेपालीहरुले घरघरमा धनधान्यकी देवी लक्ष्मीको पूजा गरेका छन्।

औँशीको रात लक्ष्मीलाई प्रसन्न पार्न घरघरमा उज्यालो पारिएको छ । यतिबेला काठमाडौं उपत्यका बत्तीको उज्यालोले झिलिमिली देखिएको छ।

फूल, रङ र उज्यालोको चाड दिपावलीमा बत्तीको झिलिमिलीसँगै खेलिने देउसी भैलीले जोकोहीलाई रोमाञ्चक बनाउने भए पनि यसवर्ष कोरोना महामारीका कारण केही कमी देखिएको छ ।

देउसी भैली कार्यक्रम कहीँ कतै गरिएका छैनन् । कोरोनाका कारण घरभित्रै सीमित बनेका कलाकारहरुले पनि  घरमा लक्ष्मीपूजा गरेका छन् ।

कतिपयले लक्ष्मीपूजा गर्दै गरेका तस्वीरहरु सामाजिक सञ्जालमा सार्वजनिक गरेका छन् । कतिपयले तिहारको अवसरमा शुभकामना दिँदै सबैको घरमा लक्ष्मीको बास होस् भन्ने कामना गरेका छन् ।