दोहा – ओमानका लागि नेपाली राजदूत सर्मिला पराजुली (ढकाल ) र ओमानका लागि मित्रराष्ट्र फिलिपिन्सका राजदूत इमेल्दा प्यानोलोङ्गबीच शिष्टाचार भेटवार्ता भएको छ ।

नेपाली दूतावासको कार्यकक्षमा भएको भेटमा राजदूतद्वयले दुई देशको आपसी सम्बन्ध तथा पारस्पारिक सहयोगका सम्बन्धमा छलफल गरेको दूतावासले जनाएको छ ।

यस्तै राजदूत ढकालले ओमानस्थित नेपाली संघसंस्थाका प्रतिनिधिहरूसँग कोभिड-१९ को महामारी लगायत समसामयिक विषयमा दूतावासमा अन्तरक्रिया कार्यक्रम गरेको दूतावासले जनाएको छ । उक्त अवसरमा दूतावासका कूटनीतिक कर्मचारी लगायत स्थानीय कर्मचारीहरूको सहभागिता रहेको थियो।

यसैबीच राजदूत ढकालले भारतीय दूतावासमा उपस्थित भई भारतका पूर्व राष्ट्रपति स्व: प्रणव मुखर्जीको निधनप्रति नेपाली दूतावास ओमान, आफ्नो व्यक्तिगत तथा ओमानमा रहेका सम्पूर्ण नेपाली समुदायको तर्फबाट समवेदना व्यक्त गरेको दूतावासले जनाएको छ ।

यस्तै, राजदूत पराजुलीले दूतावासमा नयाँ पदस्थापन भएका श्रम सहचारी दिनेश ढकाललाई औपचारिकरूपमा स्वागत गरिकी छन् ।

नयाँ श्रम सहचारीलाई शुभकामना दिँदै उनले सदैव ओमानमा रहेका श्रमिकहरूको पक्षमा काम गर्न निर्देशन दिएकी छिन् ।

दूतावासमा श्रम सहचारीको रुपमा कार्यरत कृष्णा कुमारी गौली आफ्नो कार्यकाल पुरा गरी यही साउन ३० गते नेपाल फर्किसकेको दूतावासले जनाएको छ ।