मुम्बई – केही समययता भारतीय कलाकार नवाजुद्दीन सिद्दीकी पारिवारिक विवादमा फसेका छन् । यो विवादमा नवाजुद्दीनलाई थप तनाव थपिन सक्ने देखिएको छ ।

नवाजुद्दीनकी पत्नी आलियाले पति र परिवारका अन्य चार सदस्यका विरुद्ध उजुरी दिएकी छिन् ।

भारतीय समाचार संस्था जी न्यूजका अनुसार आलियाले मुम्बई प्रहरीमा गत २७ जुलाईमा उजुरी दिएकी थिइन् । अहिले उनले घटना भएको स्थान बुढाना (नवाजुद्दीनको गृहनगर) थानामा उजुरी दर्ता गराएकी हुन् ।

आलियाले आफ्नो बयानमा नवाजुद्दीनका भाइ मिन्हाजुद्दीनले सन् २०१२ मा परिवारका साथ आफूमाथि दुर्व्यवहार गरेको बताएकी छिन् ।

यो घटनाका बारेमा उनले नवाजुद्दीनलाई भनेकी थिइन् । तर, नवाजुद्दीनले आफ्नो करिअर बिग्रन सक्ने भन्दै यो केशलाई घरमै मिलाउन खोजेको आलियाले आरोप लगाएकी छिन् ।

लकडाउनको समयमा नवाजुद्दीन आफ्नो गृहनगर पुगेका थिए । तर, उनी आवासमा भने नभएको पारिवारिक स्रोत उल्लेख गर्दै जी न्यूजले लेखेको छ ।

परिवारका सदस्यले भने आलियाले लगाएको आरोपको खण्डन गर्दै आएका छन् ।