कास्की-  पोखरा महानगरपालिकाका १७ सहित गण्डकी प्रदेशमा थप १९ जनामा कोरोना भाइरसको संक्रमण पुष्टि भएको छ ।

गण्डकी स्वास्थ्य निर्देशनालय कास्कीले विज्ञप्ति जारी गर्दै थप १९ जनामा कोरोना भाइरसको संक्रमण पुष्टि भएको जानकारी दिएको हो ।  जसमध्ये १७ जना कास्कीका रहेका छन् भने बागलुङ बडिगाडका २ जना रहेका छन् ।

कास्कीका १७ जनामा पोखरा–२३ का १ जना, १४ मा ३ महिलासहित ६ जना र वडा नम्बर ७ र ८ मा १/१ जना रहेको निर्देशनालयका निर्देशक डा.विनोदविन्दु शर्माले जानकारी दिए।

पोखरा–८ मा संक्रमण देखिएका एक जना स्वास्थ्यकर्मी हुन्। उनी पोखरा महानगपालिकाअन्तर्गतको स्वास्थ्य सेवा विभागमा कार्यरत छिन्। अन्य संक्रमित केही विदेशबाट आएका र बाँकी कन्ट्याक्ट ट्रेसिङमा परेका हुन्।

योसँगै गण्डकी प्रदेशमा २ हजार १ सय ९१ जनामा संक्रमण पुष्टि भइसकेको छ।

यस्तै गण्डकीमा कोरोना संक्रमणबाट मृत्यु हुनेको संख्या २८ पुगेको छ। गण्डकी स्वास्थ्य विज्ञान प्रतिष्ठानले सोमबार बिहान दिएको जानकारीअनुसार भदौ २६ गते मृत्यु भएका नवलपरासीको मध्यविन्दु–१२ का ६० वर्षीय पुरुषमा कोरोना पुष्टि भएको हो।

उपचारका क्रममा लुम्बिनी अस्पतालमा मृत्यु भएका ती पुरुषमा कोरोना रहेको पुष्टि भएसँगै गण्डकीमा कोरोनाबाट मृत्यु भएकाको संख्या २८ पुगेको हो।